E depósito nashonal di herensha na Johan van Walbeeckplein ta kontené mayoria di e kolekshonnan nashonal ku NAAM no ekshibí ni fia. Den e depósito aki ta warda kolekshonnan ku ta propiedat tantu di NAAM komo di otro institutonan ku a entregá nan tesoronan pa kuido den man di NAAM. E depósito nashonal ta inkluí mas ku 12.000 opheto di museo. E ta un espasio di 200 meter kuadrá den un ambiente protehá i kontrolá. 



Ambiente kontrolá


E manager di kolekshon i su empleadonan voluntario ta traha diariamente riba klasifikashon i konservashon di e ophetonan pa preservá nos herensha pa futuro generashonnan. E depósito no ta habrí pa públiko pero e ta visibel sí pa medio di un partishon di glas ku ta kore di suela pa plafònt. Riba petishon hende por bishitá e depósito, bou di supervishon di un di e empleadonan.