Entre e tesoronan ku NAAM tin wardá, tin kolekshonnan di e promé habitantenan di islanan di Antia, sinku mil aña pasá, pero tambe di partinan di poblashonnan ku a yega despues, for di Afrika, Europa i Asia. E ophetonan aki por varia di tamaño entre un boton i un piedra di mulina. Ta registrá kada opheto. Despues di saka su portrèt ta hink’é den e banko di dato i e ta keda wardá den depósito òf ta fiá otro instansia pa ekshibishon. Miéntras e kolekshonnan arkeológiko tin vários orígen, e herensia antropológiko ta konsistí mayormente di e aproksimadamente 3000 ophetonan di kultura Afrokaribense, ku pader Paul Brenneker i Elis Juliana a kolekshoná (mira Kolekshon Antropológiko, aki bou).
Kolekshon Arkeológiko
Pader Antonius van Koolwijk (1878 – 1880) tabata e promé persona ku a kuminsá ku investigashon arkeológiko na Kòrsou. Den e siguiente añanan vários otro persona a kontinuá su trabou. Resultado di e estudionan a keda wardá den depósitonan di AAINA (prekursor di NAAM). Despues ku NAAM a lanta, a tranferí e kolekshonnan pa NAAM pa nan keda na disposishon di e pais Antias Hulandes.
Kolekshon Antropológiko
Na mitar di siglo 20 pader Paul Brenneker, un saserdote Hulandes, a kuminsá investigá kultura lokal, ku atenshon spesial pa kantika i historia. Den añanan sesenta el a risibí yudansa di e artista i investigadó Elis Juliana. Huntu nan a bishitá un par di shen ansiano na Kòrsou i Boneiru, komo fuente riku di informashon tokante kultura lokal, filosofia i arte.
Kolekshon di Aruba
Na aña 2007 a transferí mayoria di kolekshonnan arkeológiko di Aruba pa pais Aruba i nan konservashon awor ta den man di museo di Arkeologia di Aruba (AMA).
