NAAM ta hopi kontentu ku e edifisio monumental na Johan van Walbeeckplein 13 den kua nan ta hospedá. Esaki tabata anteriormente e edifisio di biblioteka públiko i originalmente destiná pa akomodá un museo. E parti ménos haltu di e edifisio, pariba (ost)  tabata den man di NAAM fo’i 1988 i na 1999 e parti haltu tambe a wòrdu aloká na NAAM. Komo no tabatin fondo pa restorá e edifisio, e fundashon a pasa e edifisio pa APNA na novèmber 2005, pa restorashon i a kunbiní ku NAAM lo keda lease e edifisio pa un montante redusí durante e binti añanan siguiente.




Monumento protehá
E edifisio a wòrdu konstruí durante e di dos guera mundial. Den e añanan di guera e la sirbi komo un depósito di kuminda. Ta te na final di e periodo di guera e edifisio a haña e destinashon pa kua e la wòrdu diseñá originalmente. Biblioteka Públiko a keda hasi uso di e edifisio te na final di 1988. Dor ku e edifisio a wòrdu rekonosé komo un ehèmpel di arkitektura moderno adaptá pa zona tropikal, Johan van Walbeeckplein tabata riba Kòrsou su lista di momentonan protehá ya for di aña 1999.

Apertura maestral
Dia dieskuater di Mart, 2008, un klòk di bapor a zona den e patio na momento ku gobernador Frits Goedgedrag a inougurá e edifisio restorá di Fundashon NAAM, habriendo na mesun momento tambe e eksposishon Freeports of the Caribbean Curacao and Statia.
Mas ku 150 huéspet tabata presente na e inougurashon, kua a wòrdu presensiá dor di representante di tur e gobièrnunan, inkluyendo Minister di Edukashon i Kultura Omayra Leeflang, Louis Brown komo gobernador di Statia na e momentu ei, i representantenan di St. Maarten i Boneiru. E programa a kuminsá ku sonido di dos tròmpet, tokando riba e balkon. Despues di esei un grupo musikal, konsistiendo di un kontrabas, viool, viola, flùit, tròmpèt, guitara, guiro i drùms a toka un areglo di Dennis Aalse, inspirá dor di muzik di Afrika i Europa ku a yega na Kòrsou mas ku dos siglo pasá.